𝗙𝗜𝗦𝗢𝗞𝗔𝗙𝗔𝗡’𝗡𝗬 𝗦𝗜𝗦𝗜𝗡𝗧𝗔𝗡𝗬 : 𝗡𝗢𝗧𝗢𝗟𝗢𝗥𝗔𝗡𝗔 𝗙𝗜𝗧𝗔𝗢𝗩𝗔𝗡𝗔 𝗡𝗬 𝗦𝗘𝗥𝗔𝗡𝗔𝗠-𝗣𝗜𝗔𝗥𝗔𝗠𝗔𝗡𝗜𝗗𝗜𝗡𝗔 𝗘𝗡𝗬 𝗜𝗩𝗔𝗧𝗢, 𝗧𝗢𝗔𝗠𝗔𝗦𝗜𝗡𝗔 𝗔𝗥𝗬 𝗡𝗢𝗦𝗬 𝗕𝗘 𝗛𝗢 𝗙𝗔𝗡𝗔𝗥𝗔𝗛𝗔𝗠𝗔𝗦𝗢 𝗔𝗞𝗔𝗜𝗞𝗬 𝗜𝗥𝗘𝗢 𝗠𝗣𝗔𝗡𝗗𝗘𝗛𝗔 𝗠𝗜𝗗𝗜𝗧𝗥𝗔 𝗦𝗬 𝗠𝗜𝗩𝗢𝗔𝗞𝗔 𝗔𝗡’𝗜 𝗠𝗔𝗗𝗔𝗚𝗔𝗦𝗜𝗞𝗔𝗥𝗔

Antoka ahafahana mamerina indray amin’ny laoniny ny hari-karena ny fisokafana amin’ny firenen-kafa, antoka ifaharan’ny fampandrosoana ihany koa anefa ny fahasalamana. Izany no antony nahatonga ny Fitondram-panjakana hanokatra ny sisin-tanin’i Madagasikara ka nametraka sy manamafy ireo fepetra fiarovana rehetra mba hahafahan’ny vahoaka Malagasy miatrika ny asa andavanandrony ao anaty fahasalamana feno.

Ho fiatrehana izay fisokafan’ny sisitany izay dia nohamafisina ny fiarovana, hisorohana ny fiparitahan’ny Covid-19 sy ireo karazana « variants » eny amin’ireo seranam-piaramanidina be olona mifamezivezy eto Madagasikara dia ny eny Ivato, ny any Nosy Be ary ny any Toamasina.

Fitaovana informatika sy kojakoja ilaina amin’ny fanarahamaso ny mpandeha no natolotry ny Governemanta Japoney tamin’ny alalan’ny OIM na ny « Organisation Internationale pour les Migrations », androany teny amin’ny seranam-piaramanidina iraisampirenena Ivato.

Fitaovana izay hampiasain’ireo mpisehatra misahana ny fanarahamaso ny fahasalamana araka izany ireto fitaovana vaovao sy raitra ireto, isan’izany ny « Direction Générale des Douanes », ny « Police de l’Air et des Frontières » ary ny « Direction de la Veille Sanitaire et de la Surveillance Epidémiologique et Riposte ».

Io maraina io dia nisy ny fifanaovan-tsonia teo amin’ny Minisitry ny Fahasalamam-bahoaka sy ny Tale Jeneralin’ny habantseranana ho mariky ny fandraisana amin’ny fomba ofisialy ireo fitaovana fanarahamaso ireo.

Mitohy hatrany ny ezaka ataon’ny Fitondram-panjakana ankehitriny amin’ny fiarovana ny vahoaka manoloana ny valanaretina.

SCM/DIRCOM/MSANP