𝐅𝐀𝐍𝐀𝐌𝐀𝐅𝐈𝐒𝐀𝐍𝐀 𝐍𝐘 𝐑𝐀𝐅𝐈-𝐏𝐀𝐇𝐀𝐒𝐀𝐋𝐀𝐌𝐀𝐍𝐀 𝐄𝐓𝐎 𝐌𝐀𝐃𝐀𝐆𝐀𝐒𝐈𝐊𝐀𝐑𝐀 : 𝐅𝐀𝐍𝐎𝐋𝐎𝐑𝐀𝐍𝐀 𝐅𝐈𝐓𝐀𝐎𝐕𝐀𝐌-𝐏𝐈𝐓𝐒𝐀𝐁𝐎𝐀𝐍𝐀 𝐀𝐕𝐘 𝐀𝐌𝐈𝐍’𝐍𝐘 𝐆𝐎𝐕𝐄𝐑𝐍𝐄𝐌𝐀𝐍𝐓𝐀 𝐒𝐈𝐍𝐎𝐀

Fiaraha-miasa ho fanatsaràna ny Fahasalamam-bahoaka

Tontosa androany Zoma 27 Aogositra 2021 tao amin’ny efitrano fivorian’ny Ministeran’ny Fahasalamam-bahoaka Ambohidahy ny fanaovan-tsonia ho fanavaozam-piaraha-miasa eo amin’ny Fanjakana Malagasy amin’ny alalan’ny Ministeran’ny Fahasalamam-bahoaka sy ny Governemanta Sinoa , eo amin’ny sehatry ny Fahasalamana.

Tao anatin’izany dia nanolotra fitaovam-pitsaboana sy fanafody ho an’ny Ministeran’ny Fahasalamam-bahoaka ny Governemanta Sinoa ho fanamafisana ny rafi-pahasalamana, sy ho fampivoarana ny lafiny fitsaboana nentim-paharazana.

Misionera 5 notolorana mari-boninahitra « Ordre de mérite »

Teo ampanokafana ny lanonana, dia notoloran’ Andriamatoa Minisitry ny Fahasalamam –bahoaka, mari-boninahitra « Ordre de mérite » avy amin’ny Fanjakana Malagasy ny andiany faha-22 amin’ireo misionera Sinoa miisa dimy, rehefa avy nanatanteraka ireo andraikitra nosahaniny nandritran’ny roa taona teto Madagasikara.

Naneho ny fisaorana sy fankasitrahana azy ireo tamin’ny anaran’ny Fitondram-panjakana Malagasy, Andriamatoa Ministry ny Fahasalamam-bahoaka Prof. RANDRIAMANANTANY Zely Arivelo ary nanome toky fa ho atao mangarahara sy mitovy lenta ny fitantanana sy ny fizarana ireo fitaovana ireo.

Mitohy hatrany araka izany ny ezaka ataon’ny Fitondram-panjakana ankehitriny amin’ny fanatsaràna ny Fahasalamam-bahoaka.